الله يقطعها من شغلة، أول ما قررت اني أبلش أعمل هاي المدونة حكيت اني بديش احكي عن السياسة والوضع العام بالمرة، بس عالفااااااضي! قد ما نحاول نبعد مش قادرين!
اليوم وأنا بالسيارة طالع في أمان الله على أمتحاني اللي زبطت فيه، هالراديو شغال على اذاعة الأقصى (حماس) وهالمذيع نازل تشفير بكل واحد بسب على "صورايخ" القسام اللي المقاومة طول نهارها نازلة تعزقها على اسرائيل... والله من كتر ما حكى الزلمة اني حزنت عليه وصرت شوي وبدي أأيد هالصورايخ بس يحل عنا وينخمد ! كلها كم ساعة وروحت عالبيت في شمال القطاع، يا ولد رييح شوي ودورلك على حاجة تسكت فيها البجعات اللي في بطنك! ووووييييسسسسسسسسسسسسسسسسس، صاروخ من هالصواريخ بطلع من جنب حيطة بيتنا!! طبعا هاي مش أول مرة، بس انا قررت اني أخد خطوة في محاولة انها تكون اخر مرة، بالعادة اليهود بقصفو مكان ما بطلع الصاروخ بقذيفة، وهاد معناتو انو بيتنا رح يصير في الباي باي، انا قلت والله لو بدي أتقطع مية شقفة بدي ألعن ابو اهله اللي رمى هالصاروخ، وجراي يا ولد على الباب وألاقي الشبيحة لسه بدهم يشردو : "تعال يا واطي منك اله يا.... ويا.... ويا...."
وقفو الشباب، ونزلو معي كل شباب الحارة، مسكناهم، من وين انتا يا حبيبي، من كتائب القسام "طزززز" وليش جاي تعزق مواصيرك من عنا؟! ليش ما تروح وتعمل زلمة على باب داركم؟! وبعد كم كلمة وتلطيشة من شباب الحارة اكتشفنا انه الشباب جايين من الشيخ رضوان، اللي بعيدة عن منطقتنا 10 كيلو!!!! ومن هديك المنطقة بإمكانهم يضربو صواريخ برضو، بس ليش يعرض دارهم للخطر؟!! بصيرش...
المهم انه انا بعرف انه كل واحد بضرب صاروخ بقبض من تنظيمه 250 شيكل عالصاروخ الواحد!واذا اتطلعنا على مجمل الوضع، وقارنا الخسائر اللي احنا خسرناها من يوم ما بدينا نضرب مواصير عاليهود، وقارناها بخسائر اليهود، بتطلع هاي الصواريخ مش بس عبثية على قولة أبو مازن، بنصير نقول انه لازم نقعد هادول الناس على هاي الخوازيق (الصواريخ) زي أيام الأتراك!!!
لذلك بلاش حكي فاضي، بدنا نقاوم نقاوم صح، وبلانا من شغل الهمكبة والهبل هاد، وكم واحد ريحتهم طلعت وهما على كراسيهم وحبة مشايخ وكذبهم صار أوضح من قرص الشمس ييجوا يسوقو علينا الشرف والنضال!! حلوة هاي....والله ويخ !
said:
said:
said:
said:
برأيي كان لازم ياكلو قتلة,
المشكلة في غيرنا بفكرو انو هادول أبطال همهم يحررو الوطن..واللي بصير بفلسطين واللي بتعملو الفصائل نضال..
و ما حدا عارف انو كا هدول - للأسف و الناس اللي بستشهد - كلهم واجهة لناس حبت كراسيها بطريقة انو ترمي بأي مبدأ بس عشان يضلو على الكرسي..انشالله يصير الكرسي خزوق على رأيك...
صحيح وينك يا زلمة بطل حد يشوفك ؟!!